La terapia psicomotorica promova las resursas da l'uffant, gida el a percepir meglier l'agen corp e porscha sustegn, per che l'uffant possia nizzegiar optimalmain sias pussaivladads da svilup.
Ils suandants secturs stattan en il center dal sustegn:
- l'inschign motoric (motorica groppa, fina e grafomotorica)
- l'autonomia e la confidenza en sasez ed en auters
- l'abilitad da regular l'agen cumportament
- la cumpetenza dad ir enturn cun ils auters a moda sincera ed apprezianta
- l'abilitad da vegnir a frida a moda adequata cun pretensiuns
- il plaschair d'emprender, da sa mover e da sa confruntar cun novas chaussas
- l'activitad creativa e l'expressiun da sasez
- l'abilitad da chapir ina incumbensa e pudair realisar quella
- l'equiliber tranter il nivel corporal ed il nivel emoziunal
La terapia vegn offerta a basa individuala u en gruppas pitschnas.
Purschida
- nus faschain in scleriment psicomotoric
- nus ans occupain d'uffants e da giuvenils da la scolina fin 16 onns
- nus promovain ils uffants durant 1 fin 2 onns (en cas motivads era pli ditg)
- nus promovain ina giada l'emna en in setting terapeutic (en cas motivads era duas giadas l'emna)
- nus faschain analisas da la situaziun en scrit ed a bucca
- nus collavurain cun ils geniturs/las persunas responsablas per l'educaziun, cun persunas spezialisadas e persunas d'instrucziun e las cussegliain e sustegnain
- nus organisain perfecziunaments per las persunas d'instrucziun
La terapia psicomotorica è ina purschida pedagogic-terapeutica cumplementara a la scola che vegn offerta da las vischnancas da scola. Il Servetsch Ortopedagogic dal Grischun porscha la terapia psicomotorica per incumbensa dals purtaders da scola. La mesira è gratuita per ils geniturs/las persunas responsablas per l'educaziun.
Procedura d'annunzia
Annunziar in uffant u giuvenil pon ils geniturs/las persunas responsablas per l'educaziun sezs u – cun il consentiment da quels – era persunas spezialisadas dal sectur medicinal, psicologic u pedagogic:
al secretariat a Cuira 081 257 02 80
u al post regiunal correspundent